繼2023年《The Super Mario Bros. Movie（超級瑪利歐兄弟大電影）》打破多項紀錄、在全球斬獲13.6億美元票房後，任天堂乘勝追擊，再度與Illumination合作推出續集《The Super Mario Galaxy Movie（超級瑪利歐銀河大電影）》，唔知大家喺預告入面搵到幾多致敬遊戲原作嘅元素呢？

預告開場就接續上集結尾，講述庫巴因為食咗迷你蘑菇而縮到得手掌咁大，被困喺一座迷你城堡模型入面，受盡孖寶兄弟奚落。然後畫面一轉，瑪利歐同碧姬望住滿天流星劃過夜空，決定聯同路易吉及奇諾比奧一齊踏上星際冒險之旅。就好似原作遊戲《Super Mario Galaxy》一樣，佢哋穿穿梭唔同星球，包括一個完全由水組成嘅星球，以一個布滿倒轉金字塔嘅沙漠星球（致敬《Super Mario Odyssey》？），瑪利歐同路易吉仲係入面踩電單車狂飆！

庫巴個仔庫巴Jr.亦係片尾正式登場，並延續咗2002年《Super Mario Sunshine》嘅設定，手持一支魔法畫筆，不但可以將自己變成金屬形態，仲可以將畫筆化成流星鎚，誓要擊退瑪利歐一行人、救返老豆。與此同時，羅潔塔公主憑住一把魔杖獨自擊敗咗一隻蜘蛛機械人。

《The Super Mario Galaxy Movie》由前集導演Aaron Horvath與Michael Jelenic回歸執導，而英語配音陣容除咗Chris Pratt（瑪利歐）、Anya Taylor-Joy（碧姬公主）、Charlie Day（路易吉）、Jack Black（庫巴）、Keegan-Michael Key（奇諾比奧）等原班人馬，仲加入「Marvel隊長」Brie Larson（羅潔塔公主）及Benny Safdie（庫巴Jr.），預計明年4月正式上映。