經過三年多等待，Netflix人氣劇集《Stranger Thing（怪奇物語）》第五季第1輯（首4集）終於喺上周正式上架，為呢個傳奇系列最終章揭開序幕。據官方統計，呢季上架首5日就錄得5,960萬觀看次數，創下Netflix英語節目史上最佳開播成績；如果計埋所有語言節目，亦有第三位，僅次於《魷魚遊戲》第二季同第三季。

隨住第五季推出，唔少觀眾都返去重溫前幾季嘅劇情，令前四季喺上周全部打入Netflix全球收視排行榜Top 10，亦係Netflix首次有同一套劇可以五季同時上榜。對此，主創Duffer Brothers表示：「已經有咁多睇觀眾咗《怪奇物語5》第1輯，數字真係相當驚人，反應比我哋想像中更加震撼。套劇已經踏入第十年，但Fans群唔單止無減少，仲越嚟越多，對我哋、演員，甚至所有參與創作嘅幕後人員嚟講，都係一個巨大嘅鼓舞。我哋真係唔知點樣多謝大家先足夠，同時非常期待同大家分享第2輯...後面仲有好多精彩內容等緊大家！」

《怪奇物語》第五季分拆成三部份播出，第一輯（首4集）已正式上架；第二輯（3集）將於12月26日播出；而長達2小時5分鐘嘅最後一集大結局，則會在2026年1月1日播出。每輯上架日期均為香港時間上午9點。