如果想玩迪士尼IP主題嘅遊樂設施，好明顯就係要去迪士尼女樂園；而如果想玩《Universal》旗下IP嘅，當然就係去環球影城。但你有無諗卜過如果你想玩超人、蝙蝠俠等《DC Comic》主題嘅遊樂設施要去邊？目前應該係去美國獨有嘅「六旗」（Six Flags）主題樂園，但未來就好可能仲有其他地方可以玩到。事關據報DC Comic正尋找新嘅主題樂園合作伙伴，甚至有可能會催生出Netflix主題樂園。

圖片：Wikicommons

據《Bloomberg》上週報導，Warner Bros.旗下嘅DC Studio目前正與多個主題樂園營運商洽談合作，希望於未來開發以《DC》英雄們為主題嘅新遊樂設施同園區。而當中已經同Warner Bros.合作過有《Harry Potter》主題園區，而且據報係名單中最大型主題樂園經營者嘅環球影城，就被視為最有力嘅競爭者。

據報目前商討仍處於非常早期嘅階段，甚至未開始傾合約內容。而目前與六旗嘅合作亦唔會取消，只係《DC》會同時出現於另一個主題樂園咁解。換言之成件事睇落就唔多趕嘅。

亦正因為件事睇落無咩逼切性，再加上上星期Netflix宣佈收購Warner Bros.，於是有人推測最終結果可能唔係《DC》加入另一個主題樂園，而係Netflix自己推出一個「Netflix樂園」。其實Netflix 近年開始已經試驗以自家IP為主題、規模較小嘅「Netflix House」主題體驗館，如果真係成功收購Warner Bros.，佢就會擁有埋《DC Comic》、《Harry Potter》乃至《Game of Thrones》等非常適合做主題園區嘅IP，理論上完全可以發展成一個自家大型主題樂園。

可以肯定嘅係，無論最終《DC》係落戶邊一個主題樂園，都會係一個「更大型、更沉浸式」嘅主題樂園世界，而非依家六旗咁喺啲機動遊戲加些少裝飾就算。

資料來源：Gizmodo