如果話華納兄弟（以下簡稱WBD）收購案係啲老套愛情劇，咁WBD本人好明顯就係家道中落嘅女主角，Netflix就係同女主角眉來眼去好耐嘅企業家男一，而Paramount睇黎就係鍾意女主角但人哋睇唔上佢嘅富二代男配角。咁月頭WBD同Netflix傾掂數，喜帖都送埋出去籌備緊婚禮，仲公開發文指Paramount嘅提案唔吸引啦喎，咁富二代男配角會啲咩？就緊係搵富爸爸出手啦！

阿仔David Ellison

日前Paramount再次向WBD提出新收購案，收購價錢不變，但就多咗Larry Ellison（Paramount Skydance CEO David Ellison爸爸、Oracle創辦人兼世界首富之一）嘅個人承諾，表示會提供約404億美金資助阿仔收購WBD。新提案亦重申會有中東主權財富基金提金另外240億，淨返嗰啲就會由多間銀嘅借貸填充。而假若收購案最終被美國政府司法部門擋下，Paramount對WBD嘅賠償金亦提升至58億美金，與Netflix提供嘅一樣。

David Ellions亦於信中表示「Paramount已多次表明收購華納兄弟影業的決心」，並期望「WBD董事會採取必要措施，確保這筆提升企業價值的交易順利完成，並為未來守護與強化這座荷里活的標誌性瑰寶。」代入返之前個愛情劇比喻，就即係阿男配就去同女主角講，「我比Netflix更愛你更珍惜你，依家爸爸又支持我，佢無嘅我有，佢有嘅我有更多，你不如都係揀我啦！」

呢個新提案明顯就係回應早前WBD高層向股東發信，表示Paramount一直未能就其千億收購提案提供足夠、可信嘅財力證明，所以其提案並非一個可行選擇。而面對新提案，WBD於美國時間週一表示收到並會開始小心審視及考慮，但目前仍然維持推薦Netflix嘅提案。WBD高層亦呼籲股東們，於公司對Paramount新提案完成審視之前，唔好作出任何行動。

資料來源：PR Newswire