近年各種集玩式卡牌成為收藏界新貴，特別係高分、具收藏價值嘅《Pokemon》卡嘅更加早已經去到天價。其中由網紅Logan Paul以530萬美金（約HK$4100萬）入手、世上唯一PSA10分認證嘅「比卡超插畫家」更獲健士力世界紀錄認證為全球最高身價Pokemon卡。而近日Logan Paul就表示會將此卡放售，預計拍賣價可高達1200萬美金（約HK$9.3億），難怪佢接受媒體訪問時鼓勵年輕人投資卡牌啦！

據《Bloomberg》報導，Logan Paul已接受Goldin Auctions創辦人Ken Goldin嘅邀請，將於1月舉行嘅拍賣會中放售佢手中嘅PSA10分「比卡超插畫家」卡牌。Logan Paul目前已從Goldin Auctions獲得250萬美金嘅預付金，而估計卡牌嘅最終成交價將落於700萬至1200萬美金左右，換言之佢最終可獲利170萬至670萬美金 （約HK$1300萬至5200萬）。同時卡牌本身亦會再次刷新健士力世界紀錄。

「比卡超插畫家」最早於1997左右發行，係日本兒童雜誌《CoroCoro Comic》舉辦比賽嘅獎品，本身發行量就非常少，而Logan Paul呢張更係當中唯一獲PSA10認證，故被譽為《Pokemon》卡牌嘅「聖杯」。而翻看同款卡牌嘅成交紀錄，其身價的確可以用「暴升」黎形容。2019年時一張PSA9分嘅同款卡牌以19.5萬美金（約HK$150萬）成交，到2021年Logan Paul買入佢張PSA10時就已經要527.5萬美金。

即使黎緊嘅拍攝會以目前估計嘅最低價700萬美金成交，與2019年時相比都已經升咗35倍，升值潛力相當驚人。Logan Paul早前《Fox》電視台嘅《The Big Money Show》時，亦呼籲年輕人可以考慮類似嘅非傳統投資產品：「如果你有錢，唔好驚要承擔風險，尤其當你仲後生。」

資料來源：Fox Business