Apple AI胸針概念圖（由AI生成）

據外媒《The Information》報導，Apple正在研發一款可穿戴嘅AI胸針裝置，外型大小與AirTag相若，並內置鏡頭、喇叭同麥克風，能感知用戶周圍環境。

AirTag

報導指，呢款AI胸針外形同現時嘅AirTag相似，採用薄身、扁平嘅圓盤設計，機身以鋁金屬及玻璃物料打造。正面配備一個標準鏡頭及一個廣角鏡頭，可用作拍攝相片、影片及感應周邊環境；同時設有三個麥克風及內置喇叭，分別負責收音同播放音訊。機身邊緣亦設有實體控制按鍵，並支援類似 Apple Watch嘅磁吸式無線充電。雖然Apple希望最終成品可做到同AirTag 一樣小巧，但為容納更多零件，實際厚度預計會略為增加。

消息人士透露，目前仍未確定Apple會選擇單獨販售呢款AI胸針，定抑或同未來嘅智能眼鏡或其他裝置以套裝形式推出。不過，從其內建鏡頭、喇叭、麥克風以及實體按鍵嘅配置嚟睇，該裝置理論上可獨立運作，未必需要依賴其他產品。

Humane曾推出過類似產品「AI Pin」

事實上，AI胸針同可穿戴AI裝置至今市場反應仍然有限，例如新創公司Humane曾推出過類似產品「AI Pin」，但銷情同口碑都一般。不過，科技巨頭依然積極佈局相關領域，包括Meta推出嘅Ray-Ban AI智能眼鏡、OpenAI同Apple前首席設計師Jony Ive合作研發AI硬件，以及Amazon嘅「Bee」智能手環等，Apple自然亦不甘落後。

不過，報道亦強調，Apple嘅AI胸針目前仍處於早期開發階段，順利嘅話有望最快2027年推出，但亦都隨時有機會好似之前嘅Apple Car咁被叫停。