如果你係一個奇幻小說迷，咁你一定聽過人稱「山神」嘅美國作家Brandon Sanderson之名，甚至有可能讀過佢筆下「寰宇」（Cosmere）宇宙嘅著作系列，例如《迷霧之子》（Mistborn）又或者《颶光典籍》（Stormlight Archive）。而據外媒報導，Apple TV近日就成功買下整個「寰宇」嘅影視改篇權，並會將《迷霧之子》及《颶光典籍》等小說改編成電影或劇集，各位奇幻迷係咪好興奮呢！

「山神」Brandon Sanderson

圖片：coppermind.net

雖然目前報導就無提到Apple TV實際拎咗幾多錢出黎從「山神」手上買到「寰宇」版權，但相信銀碼就絕對唔會少。事關據報「山神」嘅小說吸引到整個荷里活所有廠商爭奪，而「山神」本人亦幾乎幾哂成個荷里活所有高層人物，最終先決定落戶Apple TV，所以待遇應該係非常豐厚。而除咗金錢回報之外，Apple TV亦罕有地大量放權予「山神」本人，據報佢唔單止會負責撰寫電影劇集嘅劇本、參與製作、成為劇組嘅顧問，最重要嘅係佢將擁有系列嘅最終審批權，確保作品符合佢嘅想像，係之前嘅J.K. Rowling及George R.R. Martin都無嘅特權。

據報Apple TV將會把《霧光之子》系列拍成電影，而《颶光典籍》則有可能改編成劇集。其中後者更已經搵到製作人，將由曾為Apple TV製作劇情類韓劇《柏青哥》（Pachinko）嘅Theresa Kang負責。

台灣「奇幻基地」推出嘅《迷霧之子》小說

同為台灣「奇幻基地」於本月推出嘅《颶光典籍》最新一集

「山神」筆下嘅「寰宇」小說系列雖然相對獨立，讀者完全可以分開閱讀，但系列之間其實擁有統一嘅世界觀，而且設定非常浩瀚而嚴謹。喺「山神」嘅設定中，「寰宇」係一個遠離地球嘅星團，並曾經擁有一個名為「雅多納西」（Adonalsium）嘅造物主。後來「雅多納西」發生「崩碎」，其力量被分為擁有不同特質或面向嘅十六等份，並造成十六位「碎神」，分佈於「寰宇」嘅不同星體/系之上，再衍生出不同特色嘅魔法系統。而「寰宇」嘅故事，其實就係以書中主角嘅角度，去參與或見證「碎神」之間嘅爭奪以及決策。

資料來源：The Hollywood Reporter