喺我細個嘅時候，最鍾意嘅課堂內容就係「睇教育電視」：你諗下唔使聽書，仲可以同同學一齊唱「一理通百里明」，唔好話睇一堂，睇一日我都得呀！不過對現代學生黎講，坐定定睇電視或者睇戲已經唔係一件容易嘅事，甚至連將來應該要製作電影嘅電影系學生，都已經無辦法一次過睇哂成套戲。

圖片：ImagaFX

話說《The Atlantic》作者Rose Horowitch日前發佈一篇文章，指佢訪問過20位電影教授後得知，現今嘅電影系學生都有「無法於課堂內坐定定睇哂一套戲唔撳電話」嘅問題；而即使佢哋「捱」哂成套戲，到教授問關於套戲嘅劇情問題時，都有一半學生答錯。

例如威斯康辛大學麥迪遜分校嘅教授Jeff Smith就分享咗一個經典例子。佢叫學生去睇法國名導演François Truffaut執導嘅1962年電影《Jules and Jim》，然後問佢哋關於結局劇情嘅問題。結果有一半學生都話主角係要避開納粹（故事係發生於一戰，未有納粹）、或者主角同作家海明威一齊飲酒（根本無呢個角色）。明明應該係最熱愛電影嘅一群人，但連啱啱睇完嘅戲都答唔到基本問題，情況的確令人擔憂。

圖片：ImagaFX

文章指出現今嘅電影教授為咗配合學生們越黎越短嘅注意力，只能要求學生去睇電影嘅特定段落；同樣嘅情況亦出現於高中英文課，老師只能要求學生去讀著作嘅某一部份。

不過《The Hollywood Reporter》嘅報導就指出，年輕人「無辦法坐定定睇哂套戲」唔代表佢哋唔鍾意電影，只係佢哋嘅觀影習慣與之前嘅人唔同。事實上，早前就有報導指出Gen Z其實熱愛入場睇戲，尤其熱愛A24出品等獨立電影，荷里活中甚至有人將佢哋稱為「Letterboxd世代」（Letterboxd係一個電影日記網站，容許用戶之間互相交流），顯示佢哋仍然係重要嘅觀眾群之一。

資料來源：The Atlantic、The Hollywood Reporter