隨住《Avatar: Fire and Ash》（Avatar 3）於全球上映接近兩個月，目前已可大致推測其最終票房會落於14億美金左右。呢個數字唔單止令佢成為僅次於《哪吒之魔童鬧海》（22.6億美金）及《Zootopia 2》（優獸大都會 2，18億美金）嘅2025年度票房第三，更成為史上最高票房前二十名之一，睇落算係一個成功。不過由於《Avatar 3》嘅製作成本超級高，所以淨計票房的話目前其實仲未回本，仲令系列嘅未來蒙上陰影。

早於2022年James Cameron接受媒體訪問時，就已經提到《Avatar》系列其實需要15億美金票房先算係回本，連佢都自嘲《Avatar》係「電影史上最差嘅商業項目」。事實上喺《Avatar 3》上映之前，James Cameron就已經打哂開口牌，指依家觀眾唔太鍾意入場睇戲、再加上有所謂嘅「續集疲勞」，所以《Avatar 3》嘅票房未必有前兩集咁好。佢甚至已經諗定如果票房成績唔好，無法說服Disney科水拍第四及第五集的話，咁佢可能就會改為寫書，就或如12月尾所言開個記者會去交待故事後續。

由於有院線分成及宣傳費用，所以一般電影嘅票房要達到製作費嘅三倍先算有錢賺，呢個亦係點解製作費約5億美金嘅《Avatar》系列要有15億票房先叫回本。但值得一提嘅係，對於出錢嘅Disney黎講，其實就唔只票房一項收入，仲有電影帶動嘅Disney Plus訂閱，以及主題樂園入場人數等，所以計條大數的話《Avatar 3》好可能係有錢賺。

換言之對系列未來影響最大嘅，其實唔係票房蝕唔蝕，而係對比起頭兩集嘅跌幅。《Avatar》頭兩集嘅全球票房分別為29.2億及23.3億，換言之《Avatar 3》票房只有第一集嘅一半，同第二集都相距四成，按此推算下去第四集票房可能就不足十億，假如製作費不變，咁就真係蝕到入肉。

資料來源：Variety