雖然距離Pokémon 30周年紀念日「Pokémon Day」仲有一個星期，但官方今日已率先放出首個重要消息！宣布GBA經典之作《Pokémon 火紅/葉綠》即將強勢登陸Nintendo Switch/Switch 2平台，帶領各位老玩家重返熟悉嘅關都地區（Kanto），再次展開訓練家之旅。

The Pokémon Company今日突發宣布，《Pokémon 火紅/葉綠》由即日起已於Nintendo eShop上架並開放預購。今次官方將遊戲分為「火紅（英文版）」、「火紅（日文版）」、「葉綠（英文版）」同「葉綠（日文版）」4個版本（無錯，係無中文版本），每個版本售價均為HK$100。不過各位Fans要留意，雖然而家可以預購定先，但就仲未有得正式開機玩住，要等到2月27日晚上10點舉行嘅「Pokémon Presents」直播節目結束後，遊戲先會正式解鎖，屆時大家就可以再次面對當年揀小火龍、車厘龜定奇異種子嘅經典抉擇。

作為初代Pokémon《紅/綠》嘅重製版，《火紅/葉綠》當年憑住大幅進化嘅畫面同系統，喺2004年登陸GBA平台後成功俘虜無數玩家。今次Switch版將會保留原汁原味嘅像素風格同關都魅力，連當年爆機後先去得嘅隱藏地圖「七島/七之島」亦會完整收錄。更重要嘅係，今次Switch版確認支援本機連線功能，畀大家可以還原當年同朋友「連機」交換精靈兼對戰嘅樂趣。