Netflix收購Warner Bros. (WBD) 一事於過年前都仲係順風順水，似乎只係等時間到就可以完成交易。但過年期間嘅種種發展似乎就表示風向急變。先係荷里活名導James Cameron向國會議員發信，表示若Netflix收購WBD，將會殺死整個院線市場，繼而危害美國電影發展；近日又有報導指，美國不論政黨嘅14個州司法部長都密切關注緊WBD收購案，顯示收購案可能會有政治上嘅阻礙。不過最重要嘅係，WBD早前宣佈會與更新出價嘅Paramount重新展開談判，表示Netflix唔再處於絕對嘅領先位置。

話說James Cameron近日向特朗普支持者、猶他州參議員Mike Lee去信，提出自己對Netflix收購WBD嘅意見。James Cameron於信中指荷里中有一股「大致沉靜但迅速高漲」嘅意見，反對Netflix收購有103年歷史嘅WBD，並指「Sarandos係一個好人，而且係一個聰明嘅生意人及創新者，但佢公司嘅目的係與院線市場嘅健康背道而馳。」同時佢亦指萬一Netflix成功收購WBD，將會加速院線市場萎縮，導致院線結業、員工失業、未來更少電影製作、繼而減少美國文化輸出。

以James Cameron嘅地位，佢嘅發言當然相當有重量。但更重要嘅或者係Mike Lee嘅回應。佢指除咗James Cameron之外，仲收到「好多演員、導演以及其他團體有關Netflix收購WBD嘅意見，而我與佢哋有同樣嘅擔憂。我期待於未來嘅聽證會上繼續處理呢啲問題。」而同一時間，加州司法部長Rob Bonta亦於日前公開表示會密切關注「WBD收購案」，據財經消息表示，Netflix管理層曾向投資者表示有13至14個州嘅司法部都調查緊收購案，有可能會作出干預，反映Netflix喺收購嘅法律層面上仲有遙遙長路要走。

James Cameron

圖片：Wikicommons

而Netflix嘅對手Paramount亦於適當嘅時候補刀。Paramount於上週五表示，佢哋已經渡過咗「第二次回應司法部的資訊請求後的10日等候期」，並將其引伸為「此次收購不存在任何法律障礙」，以此證明自己比Netflix更有機會完成收購WBD。Netflix方面就火速回應指Paramount繼續誤導大眾及WBD股東，表示過咗等候期唔代表司法部「通過」收購案；而Netflix目前亦處於回應司法部資訊請求嘅期間內，所以其實Pararmount並唔係大幅領先。

不過最重要嘅，可能係WBD對於Paramount新出價嘅回應。Paramount於2月中提出新報價，表示願意支付WBD與Netflix嘅「分手費」，以及若交易未能如期完成會向股東作出賠償後，WBD表示會與Paramount重新展開短期談判，期限到美國時間今日為止。換言之今日稍後時間就可以知道究竟係Paramount第三次食檸檬，定三顧草蘆之後終於成功橫刀奪愛。