《星球大戰》系列闊別7年即將重返大銀幕，但最近有消息指，迪士尼內部對於打頭陣嘅《曼達洛人與古古（The Mandalorian and Grogu）》感到相當緊張，反而對另一部製作中嘅星戰電影《Starfighter》就充滿信心。

據外媒《Variety》引述知情人士透露，雖然「曼達洛人」同「Baby Yoda（古古）」喺Disney+劇集大受全球Fans歡迎，但迪士尼一直擔心，呢份「串流平台熱潮」未必可以轉化為強勁嘅票房號召力，怕觀眾會將由Jon Favreau執導嘅《曼達洛人與古古》視為一套「加長版劇集」，對無睇開劇集嘅觀眾吸引力有限。另一方面，電影早前喺Super Bowl播出宣傳片未見成效，官方冇走傳統電影預告路線，反而惡搞百威啤酒（Budweiser）經典廣告玩噱頭，結果唔單止未能炒熱氣氛，仲令部分死忠Fans感到失望，一般觀眾亦覺得不明所以，未達預期宣傳效果，進一步加深公司對票房號召力嘅疑慮。

《Star Wars: Starfighter》

相反，迪士尼對另一部由《死侍與狼人》導演Shawn Levy執導、Ryan Gosling主演嘅星戰新作《Starfighter》就顯得相當樂觀。雖然《Starfighter》嘅具體劇情同細節仍然保密，但睇過試映片段嘅內部人士都讚不絕口，尤其點名盛讚Ryan Gosling嘅演出，仲話Shawn Levy成功重拾星戰系列昔日嘅玩味精神（recaptured the franchise’s spirit of fun）。

《曼達洛人與古古》將於今年5月正式上映，作為星戰系列回歸大銀幕嘅頭炮，絕對不容有失！到底呢對超人氣「父子」可唔可以打破高層嘅疑慮，再次帶起星戰熱潮？大家到時又會唔會買飛入戲院呢？

資料來源：Variety、movieweb