EVA廿週年紀念電話花款你話事!

文：MenClub 魏文青　　
POSTED ON 15 Jul 2015

廿週年紀念嘅《EVA》有幾多嘢玩？先係射(唔成)支朗基努斯之槍上月球、再黎就係足柄Expasa嘅大型初號機、然後有本動畫設定集、仲偷偷地放風話年尾會有新劇場版完結篇，完未？未！因為黎緊仲有部「EVA Smartphone」，仲開放畀你投票要有咩花款添！呢個坑跳得心甘命抵啦？

嗱首先要搞清楚，部機係預計年尾先開賣，所以目前關於啲咩OS規格頻譜乜乜七七全部都係一個謎。唯一知道嘅係官方目前募集緊一個名為「Evangelion Smartphone 開發Support Member」嘅限定三萬人組織，呢三萬人除咗可以透過簡單嘅問卷調查為「Eva Smartphone」比意見，仲可以登入特別網站得到最新情報。但最吸引嘅都係張有編號嘅「Official Supporter」證，以及限定十個得獎者嘅Eva尿袋。

至於份問卷，其實得三條問題，分別係問你想機背有咩主題、以咩風格呈現、以及想用邊三位聲優嘅聲黎做電話嘅系統音。OK，咁起碼我哋都知佢係有背同有聲嘅。

仲有個好消息，就係官方話咗部機會係Sim-Free版，即係理論上要拎返黎香港用都冇問題－－前題當然係你要買得到。