書中真係有間屋東京書店式酒店

文：MenClub 魏文青　　
POSTED ON 29 Oct 2015

對唔住，文青又講大話誤導咗你入黎，因為喺書入面嘅嚴格上唔係一間屋，而係一間房－－再準確啲黎講，就係一個床位添！

話說近期喺日本池袋西口附近就開咗間叫做「Book And Bed Tokyo」嘅酒店，賣點就係冇高床、冇軟枕，「淨係」得超過1700本中外書藉陪你瞓。點解要咁做？佢個網站就話因為大家都應該試過睇書睇到好入神，所以就算好眼瞓都唔捨得瞓，最後連攬住本書瞓著咗自己都唔知(呃…文青仲讀緊書嘅時候都有試過…不過通常都係上緊堂…)。為咗等一眾愛書之人可以安安樂樂咁瞓，所以就整咗呢間佢其實係一間有床嘅書店。

既然個重點係睇書，大家就唔好期望佢啲床位會有幾寬敞舒適。事實所有床位都係位於書架之後，基本上就係日本「棺材」酒店(膠囊酒店)格局。最犀利嘅係佢連棺材都仲有分大細！「大房」係120cm(闊) x 200cm(長)，都已經唔「大」，間細房就直頭得80cm闊，分分鐘窄過你屋企張床。之於高度佢冇講，但以我睇圖黎估呢，應該都係坐喺到都要耷低頭啦。

但你又唔好睇我講到咁，就以為我係叫大家唔好去喎！事實係啱啱相反－－首先你同啲書一齊瞓呢件事已經真係好「文(藝)青(年)」，個床位仲要咁細即係好明顯係自己一個瞓。一支公半夜三更喺東京酒店睇日文書，再加多杯Dry Martini影相Post上網啲女仲唔畀你溝哂真係？

最重要價錢！「大房」每晚盛惠4500Yen(約290港元)，細房再平啲只需3500Yen(約225港元)，不過全店就只有兩間細房。而且每日四點鍾Check-in、第二朝十一點退房，鍾意瞓到黃朝白晏嘅你就要辛苦啲啦。再唔係可以選攝日埸(13:00~19:00)去見識下，冇覺瞓，冇涼沖，但只需1500Yen(約96港元)。平平地咪當新景點睇下囉！
bookandbedtokyo