Curry嘅Jump Shot可謂百步穿揚，背後當然係大量練習嘅成果。佢自己就話視乎唔同時段，佢嘅練習量都會有唔同。例如平日操練一課佢會射300球，抖暑嘅時候就會增加到500球。原因係季中仲要應付比賽，而且練習目的都只係「保養及微調」，所以要避免消耗太多體力。　而到暑假嘅時候就可以盡情練習力求進步。

飲食方面，作為運動員嘅Curry當然需要大量卡路里，而佢亦有稍為注意一下食啲咩會比較多營養以及有助回復體力。不過大致上佢都係咩都會食。不過咖啡佢就唔係好飲啦！

另一個有助Curry表現嘅方法，就係一個自動馬桶－－冇錯！就係大媽們去日本搶嗰隻！話說上年11月Curry喺Twitter好開心咁宣佈佢老婆買咗個自動馬桶，之後係一個訪問中，佢仲話相信自己嘅比賽數據，喺收到個馬桶之後會有所提升。甚至講到當日聽到個消息，第二日作客明尼蘇達已經開心到拎咗46分！到近日個馬桶終於安裝好，佢仲拍咗條自己登上「皇座」嘅片添！

而Curry屋企嘅另一個缸，就係一個可以完全黑暗兼隔音，容許使用者浮於體溫鹽水內嘅「Sensory Deprivation Tank(又稱Isolation Tank，貌似未有正式中文名，我就叫住做「封閉缸」先)」。呢個封閉缸內嘅水加咗有助放鬆肌肉嘅浴鹽同鎂，而且完且「與世隔絕」亦有助放鬆身心靈。Curry每隔個星期都會入個缸到浸一個至個半鐘，喺入面享受一下屬於自己嘅時間。之前好多媒體都將Curry嘅神表現歸功於個「封閉缸」架！

Curry亦透露佢好著重自己嘅比賽數據，覺得有助日常訓練甚至可以避免受傷。但成隊勇士黎講就唔算特別注重數據分析，只係會知道一場跑動距離、轉向次數等等有助日常訓練嘅數據。

佢亦提到由訓練員Brandon Payne提出嘅「神經效率(Neurocognitive efficiency)」。Curry話所謂「神經效率」係幫助球員於場上做更快同準確嘅決定。喺訓練嘅時候佢哋會喺牆上裝上唔同顏色嘅燈，而球員就要一邊控球，一邊撳燈。習慣咗之後反而會覺得比賽節奏比實際上慢，場上決定亦會做得更快。

Business Insider亦問到Curry投出壓哨球時嘅心情，Curry就話佢當時諗嘅通常都係「我最好射入呢球」。不過佢就話對自己相當有信心，認為呢一球喺平日練習中都練過無數次，身體已經記得要點射先會入。而係場上佢幾乎唔怕甚何嘢，但就會特別小心唔好有Turnover，甚至會同媽媽對賭每場嘅Turnover數字，所以會特別上心。

Business Insider