圖片：the guardian

前晚英國內戰英格蘭以2-1反勝威爾斯，鶴臣用盡4個前鋒爭取到出線重要3分，不過重用敗家仔史達寧同埋無供應下無發揮嘅哈利簡尼令鶴臣飽受批評，而且入嘅兩球都係與對方失誤同球員個人能力多過戰術使用得宜。英格蘭今次陣容係歐國盃所有球隊中最年青，而且位位都係明日之星，要重新成為強隊唔係無機會，但首先要炒鶴臣。

圖片：skysports

英格蘭今季三線實力都好均等，不過仲有好大進步空間，眾所周知鶴臣從來都係睇球會揀人，細會如韋斯咸有盧保同奇兵安迪卡路爾即使聯賽有表現都係無入選，反而喺阿仙奴正選都唔係成日有嘅韋舒亞就入選，當然有人話打國際大賽嘅話有時大賽經驗比本身實力緊要。但見到華迪對威爾斯後備入替就幫球隊入波兼追平，就知呢個想法都唔係絕對。

圖片：dailymail

鶴臣最嘔電嘅係佢唔會因應球員表現或者戰術需要改變陣容，對俄羅斯同對威爾斯兩場正選陣容都係一樣，無論哈利簡尼同史達寧打得幾差都好。咁英格蘭中前場供應未夠，哈利簡尼無表現都情有可願，但史達寧就真係無腳好波，上場拉蘭拿提供咗個絕佳機會連門框都唔中，搵佢打翼又不如用占士米拿好過，或者索性打4-3-3。反正多前鋒。

圖片：the guardian

完咗歐國盃就要放眼兩年後世界盃，難得英格蘭潛力都幾大，如果因為領隊戰術安排失當同用人保守搞到無成績都好可惜，基本上兩年前世界盃分組賽出局就應炒佢，留得低真係千容奇謎。我自己認為，今屆歐國盃打成點都好，為將來發展，一定要炒鶴臣。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、網台節目主持、Menclub足球文章作家、演

員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。