超合金之塊五色高達合金

文：MenClub 魏文青　　
POSTED ON 10 Jul 2016

早排就介紹過由「魂」旗下「超合金之塊」出嘅「龍珠合金塊」，反應就相當唔錯。近日同一個系列就染指另一個國民動畫，就係高達！而且仲一出十隻！睇黎高達迷又要破費啦！

呢一組十隻合金塊其實係五隻機體，當中包括高達、馬沙專用渣古、渣古、老虎同龜霸。每隻機體又有兩隻色，分別係普通嘅銀色，以及各自嘅專用色，分別係金(高達)、紅(馬渣)、綠(渣古)、藍(老虎)同銅(龜霸)。每隻大約為6~7cm高，同樣用上「Die Casting」技術，所以機體細節都尚算完整！尤其係有顏色嘅五隻，放出黎真係五星戰隊咁款，睇落相當唔錯。

呢一套十款高達「合金塊」預計今年11月於日本開售，價錢係1200一隻，即係大約90蚊左右，收哂成套就差唔多要成千銀啦－－冇計啦，近期啲Yen咁鬼貴！另外順帶一提，上次介紹過嘅龍珠合金塊都有新色，分別係界王拳紅悟空、金比達同金杜拉格斯。

超合金の塊