圖片:dailymail

星期日晚歐洲國家盃決賽對我嚟講係足球界最黑暗嘅一日，因為我最憎嘅葡萄牙捧盃，咪同我講佢哋點實至名歸法，足球有時就係咁唔理性，總之我葡萄牙好我就唔鍾意，話知你有丙朗蘭尼兩個前曼聯人喺度都係咁話。講開曼聯，大家都估緊摩連奴所講嘅第四位新球員好大機會喺前青訓普巴。但係人都知祖雲達斯開天殺價要一億二科千萬鎊先會放人。連有西班牙政府back up嘅皇家馬德里都放棄爭奪普巴，講真，曼聯有錢都唔係咁使啦。

如果講歐洲國家盃表現，普巴得一個入球同做過一次man of the match又真係幾唔抵。亦有講法話因為普巴喺法國係打防中，但祖雲達斯佢就打box to box，所以影響表現。呢個係有關係嘅，如果講球技，普巴係幾全能，你要身體質素，佢又高又強壯，體能又好絕對滿足到；技術同射術都唔錯，真係好全面。但如果去到億億聲，相信球迷希望嘅就唔止咁少，更希望佢有一定嘅精神力，可以改變比賽，但睇歐國盃一見法國形勢唔多好時，普巴除咗發爛渣就乜建樹都無，如果係四五千萬，咁就OK嘅。所以科拿話普巴版高估都唔係無道理。

另外曼聯喺中場位置上，係咪最需要增兵嘅地方？如果講急，中堅同翼鋒先係最急，中堅除咗鍾斯長期做文員同埋白蘭特唔啱打之外，仲有史摩寧渡假時受傷季初會缺陣，唔通新援拜利係神童可以咁快擔大旗咩。另外曼聯上季無攻勢除咗雲高爾戰術保守之外，邊線無人可以突破都係原因之一。左邊都有馬迪爾開山劈石，右邊就真係差咁啲啦。有成億鎊，喺球壇幾乎可以買到任何人，買唔買到普巴呢啲好閒啫。

最重要係曼聯真係咁闊佬買普巴返嚟，其實對曼聯喺轉會市場非常不利，一來眾所周知曼聯復興心切，賣人俾曼聯一家定set高一兩個價位掠返筆；二來買普巴係令曼聯嘅財力暴露於人前，一億買普巴都面不改容，俾多一千幾百萬鎊我賺下都好閒啫，將來賣球員俾曼聯嘅球會一定咁諗。小數怕長計，買多幾個就使多好多架啦。今日有消息話普巴本人同祖雲達斯都唔想離隊，如果係就最好。因為完全睇唔到除咗祖記之外，曼聯喺呢次交易會得到乜嘢好處。

李羅渣(facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者除咗足球最鍾意就係睇戲、睇書、飲兩杯唔求發大達，最想成為有些少生活品味嘅偽文青。