去到邊沖到邊超平價流動花灑

文：MenClub 魏文青　　
POSTED ON 01 Aug 2016

呢個天氣，唔好講出街做運動、捉小精靈，淨係「行落街再利返上樓」呢個都已經可以令你好似聽完林峰首《Lets Get Wet》咁。喺呢個時候你最需要嘅當然係沖返個靚涼再撻喺到嘆冷氣。問題係如果你喺街，又點可以好快咁沖涼呢？以下呢個只係價值9.99USD嘅流動花灑就啱哂你啦。

呢個「Simple Shower」望落去同屋企支洗頭水個揼非常似樣，實際用法其實都真係差唔多。先搵個容器，例如汽水樽，裝入清水，再擰個Simple Shower落去，成個反轉，佢就會成為一個手提花灑。除咗汽水樽，亦可以用於任何擰得上嘅容器之上，真正簡單方便快捷。官方推介嘅用處包括去Camp嘅時候沖涼、淋熄火種、去沙灘嘅時候用黎沖腳等等。另外由於Simple Shower係等啲水自然流出，所以都適合用於BB仔同寵物之上。

原理真係好簡單，但又真係幾有用，而且只係七十令蚊港紙，我就覺得相當唔錯啦——不過我懷疑淘X上面應該有9.9人仔咁囉。