圖片：Theguardian

比利時喺歐洲國家盃八強出局後就即炒領隊韋莫斯，到咗呢個星期終於搵到人接任，就係上季完結就俾愛華頓炒魷嘅西班牙領隊馬天尼斯，執教生涯全部喺英格蘭渡過嘅佢，係第一次執教國家隊，上任第一個任務，就梗係帶領比利時打好嚟緊嘅2018年世界盃外圍賽，務求兩年後帶住比利時進軍俄羅斯啦。

圖片：Theguardian

馬天尼斯先後教過史雲斯、韋根同愛華頓三支球隊，最威一定係帶當年降班嘅韋根贏到球會首個足總盃冠軍啦，可惜上季帶愛華頓以第11位完成賽季被炒。比利時會搵馬天尼斯唔難理解，比利時陣中唔少球員都喺英超搵食，馬天尼斯喺英格蘭打滾咁耐，對陣中球員有一定了解嘅，咁馬天尼斯打算點教呢隊比利時先？「我哋會喺控球方面花多啲功夫同成為一隊善長進攻嘅球隊，同時注重防守。我希望打漂亮足球同時係可以嬴波。」同時注重防守，愛華頓球迷聽到呢度唔知點諗呢？

圖片：Theguardian

比利時射手盧卡古喺歐洲國家盃表現差劣被外界狠批，今次喺國家隊同一手帶佢去愛華頓嘅馬天尼斯故劍重逢，佢一定係最開手嗰個，喺馬天尼斯手下三季入咗成62球，睇嚟有說明書喺手嘅馬天尼斯可以幫盧卡古喺國家隊得到同球會一樣嘅表現，馬天尼斯都話將盧卡古變成世界級前鋒係佢目標之一。咁邊個比利時國腳最無運行？應該都係打愛華頓嘅米拿拉斯，上季喺愛華頓佢個右翼位排喺連儂同迪路菲奧之後，就因為馬天尼斯認為米拿拉斯走緊下坡所以不受重用，有啲拖肥迷嘅群組就講笑話馬天尼斯教比利時就等於米拿拉斯間接退出國家隊咁話。

圖片：Telegraph

要講馬天尼斯最大挑戰，一定係語言。比利時官方語言係荷蘭文、法文同德文，而馬天尼斯本人就一樣都唔識，連佢本人都話即使願意融入比利時文化，但要佢學晒三種語言都係Mission Impossible。比利時國腳主要都係法文系同荷蘭文系，仲要唔少球員係唔會識另一種官方語言，各自擁有不同文化同價值，呢個係比利時打起上嚟好睇唔好食嘅主因。唔好講捧盃咁遠，淨係點磨合兩個語系嘅球員加強球隊向心力已經有排搞，馬天尼斯呢份新工唔易候呀。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。