圖片：mirror.uk

仲記唔記得2012年倫敦奧運有隊英國隊？當時有傑斯、艾朗藍斯同史杜烈治打同一隊，都叫實現唔少英格蘭迷同英超迷嘅心願，不過由於奧運賽制嘅關係，陣容就唔算太強。其實英國國內一向有不同聲音希望可以再組一次英國隊，次但係下一屆東京奧運，英國隊有機會重組，雖然而家十劃未有一撇，但總好過無呀。

圖片：skysports

英格蘭足總主席Greg Clark就話，上星期三喺雅典開歐洲足協會議前，英國四個足總都有傾過下屆東京奧運合組英國隊嘅可能性。不過又唔使有咁高期望，因為而家係連好正式嘅會談都未有，咁你可能會問，組英國隊有咩唔好？其實真係無咩嘢唔好，只係四個英國組成國嘅足總都有自己條數計，就係擔心FIFA會重新思考佢哋嘅獨立地位。

圖片：skysports

Greg Clerk就拍晒心口話呢個唔係一個問題，因為前FIFA主席白禮達同現任主席恩法天奴都好支持英國隊重組，只係英格蘭以外嘅足總覺得，始終英國四個組成國有各自嘅代表隊同聯賽已經有過百年嘅傳統，而且你都知，英格蘭同其他幾個組成國都有唔同嘅恩怨，好似如果而家中國足總話想同香港、澳門、台灣整隊大中華隊，你都唔肯啦。

圖片：premierleague

其實唔止為奧運組英國隊，甚至有人提出過不如以後英國都係一支代表隊同一個聯賽系統。當然呢個困難就更大啦，除咗民族主義同政治問題，仲牽涉職業聯賽嘅利益，同埋球員打國際賽嘅機會問題，英國隊呢樣嘢四年一次玩下就好，但長久合併，相信大家都唔睇好。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。