圖片：香港飛馬

傑志中心收地事件發生到而家都只係好短時間，當然唔會咁快有解決方法，不過對於支持本地波嘅朋友就非常洩氣，難得有個質素比較好嘅足球訓練基地，但用得嗰一年多啲就話拆，無論乜嘢角度睇對香港足球發展都係一種倒退。但事件發生唔夠一星期，又爆出香港飛馬舊年喺預備組聯賽打假波事件，為傑志中心收地事件帶嚟嘅本地波低潮雪山加霜。

事情詳細係點就唔多講，但相信有啲朋友好奇怪預備組有乜野打假波嘅動機？你以為大陸同外國得港超先有得賭？少年無你太年輕了，大陸有唔少莊家都會嚟香港睇預備組聯賽，有啲賭博網站仲有文字直播添，賭波嘅嘢，有聲氣就有得賭。另外，預備組仲有一個盃賽賽事叫主席盃，一樣係大陸有開盤嘅賽事，所以預備組賽事絕對有打假波嘅誘引架。

圖片：蘋果日報

做足球員生計都幾無保障，老老實實香港有將多個葉鴻輝呀？踢波除咗球會份糧仲有廣告拍同做代言人真係無幾個。好似前黃大仙中堅趙俊傑之前接受傳媒訪問就話過靠球員份糧生存唔到要去做兼職幫補。當年效力福建時連二千幾蚊一個月都捱過。趙俊傑情操高尚，咁艱苦都堅持自我當然值得尊重。不過政府無支持香港足球就為打假波提供溫床。又得罪講，香港球員搵食咁艱難都係間唔中爆一單假波都算係咁，當然，飛馬嘅事件都可能係冰山一角。

圖片：香港足球代表隊粉絲專頁

雖然香港足球長期寒冬，但係我哋香港代表隊總係迎難而上唔會令大家失望嘅，今輪國際賽香港隊表現出色取得三連勝，分別作客贏柬浦寨、澳門同主場贏埋新加坡，仲要係無失過波。雖然對紮浦寨同新加坡都係友賽性質，但兩隊對手實力都比香港為高。香港足球，無香港人支持就乜都唔係，雖然間唔中香港足球都有令人失望嘅時間，不過無香港球迷，就唔會有人支持香港隊，大家支持香港足球，就算唔係次次入場，但多啲留意香港足球，對香港足球發展都有幫助，淨係三分鐘熱度，對中國隊先嚟we are Hong Kong真係無意思。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯 唔求發大達，最想成為有些少生活品味嘅偽文青