近呢幾年有唔少體壇巨星相繼退役：NBA有高比拜仁、鄧肯；足球除咗謝拉特之外，近日又有一位經典球星退役，佢就係林伯特。38歲嘅佢前兩日喺instagram宣布掛靴，結束21年球員生涯。雖然林伯仍然得到唔少球會邀請加盟，不過考到教練牌嘅佢決定展開新生活，英格蘭黃金一代又退一員。

林伯特生於足球世家，打左閘嘅父親老林伯特職業生涯長期效力韋斯咸，順理成章林伯特就喺韋斯咸開始佢21年球員之路，雖然年青嘅林伯特表現出色，更有唔少正選上陣嘅機會，但因為父親被指偏幫兒子而未能夠站穩正選位置。最後林伯特喺2001年球季轉投同樣喺倫敦嘅車路士，自此開始佢嘅傳奇。往後十幾年生涯佢唔止幫車仔贏咗三個英超冠軍、一個歐聯冠軍同四次足總杯冠軍，林伯特更加係英超連續上陣最多嘅球員，同時以211球成為車路士球會史上入球最多嘅球員。直到2013-2014年決定離開車路士加盟紐約城，又以借將身份加盟曼城。

林伯特最為人津津樂道嘅就係佢作為中場嘅佢有非常高效嘅入球能力。無論遠射、罰球、後上都難佢唔到，就算係現時，英格蘭國家隊都相當缺乏呢類球員。林伯特雖然喺球會生灘贏盡所有。可惜係喺國家隊雖然有106次上陣都贏唔到任何國際賽錦標，都算係林伯特嘅遺憾。坦白講，小弟唔算特別留意林伯特，但林伯特轉投曼城主場倒戈對車路士，後備上陣入球後拒絕慶祝嘅神情到而家仍然印象深刻，林伯只係輕輕舉手示意唔想慶祝，但眼神睇到林伯有幾愛車路士，呢個應該算係林伯特職業生涯其中一個重要畫面。

好多人都會鍾意用謝拉特同林伯特做比較分高下。謝拉特喺英格蘭嘅成就當然高啦，不過林伯特除咗好波之外，更加懂得控制情緒，時刻保持頭腦冷靜，令佢成為球場上一個可靠嘅伙伴，繼而可以為球隊作出最好選擇改變比賽。喺車路士時軍醫幫林伯特做過智商測試，發現林伯特智商達149，事實上林伯待本身讀書都唔差。而家林伯考教練牌，相信好快會見到林伯特用領隊身份重返球場。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。