土地問題終結者 HONOMOBO貨櫃屋

文：MenClub 魏文青　　
POSTED ON 10 Apr 2017

香港嘅土地問題講咗咁多年，基本上都係冇咩點改善過，來來去去都係「唔夠地」同「冇位起」，間唔中就加多幾個如「郊野公園」、「高爾夫球場」、「棕地」咁嘅關鍵字基本上就咩都講哂，而且亦都唔見有啲咩新方法提出過。其實既然咁多地都係放咗貨櫃，咁直頭起「貨櫃屋」又有冇得諗呢？
「H01」型號示範單位圖
講緊嘅當然唔係平時車場入面會見到嘅貨櫃屋咁簡單。外國設計公司「Honomobo」真係推行緊一種以貨櫃作為主要結構嘅建築方式，佢哋睇中貨櫃本身嘅耐用、現成就有、以及可以如積木一樣堆疊嘅特性，設計出多個模組，等買家可以因應自己嘅需要選購。最平嘅「H01」闊8尺、長26尺，包咗一個7尺x 9尺嘅睡房、一個7尺 x 5尺嘅浴室，同一個7尺 x 6-8尺嘅玄關加廚房，都只係需要4.3萬美金，即係34萬港紙唔使，仲要做到按揭(喺美國)。

就算係最貴、最大、佔地1216尺嘅「H04+」，都係賣緊18萬美金，即係140萬唔使，但就已經換黎三房兩廳加廚房嘅豪宅級設施。如果你鍾意，佢仲可以為你嘅貨櫃屋加個石屎底，可以做車房、儲物空間，當然你亦都可以就咁用樁柱鑲落個地到。向上佢甚至疊起多個貨櫃，建造出多層建築，天花之上可以裝太陽能板，據稱全年供電量會畀你用電量仲高；向下就可以幫你整埋污水池。簡單啲黎講就即係你只需要有塊地你就有個安樂窩啦！
H04+ 示範單位圖
不過香港最大問題好似就係冇地呀可？咁呀…當我冇講過，大家繼續羨慕人地先啦下。
Honomobo