唔嫁又嫁前拳王Mayweather復出對決UFC巨星

文：MenClub 魏文青　　
POSTED ON 13 Mar 2017

當大家都沉醉喺「神奇小子」曹星如喺星期六獲得職業生涯21連勝嘅時候，近日國際拳界其實都仲有另一單大事發生，就係職業生涯49勝(其中26場KO)、9條冠軍腰帶得主嘅退役美國拳王Mayweather近日諗住復出喎，為嘅就仲要係一個UFC選手？
Mayweather曾經於2015年對上菲律賓拳王PACQUIAO
話說就咁嘅，由上年開始Mayweather就同現任UFC羽量級、輕量級雙料冠軍Conor McGregor喺網上你來我往，Mayweather一直有意同呢位28歲嘅愛爾蘭人上擂台決戰，而McGregor嘅反應亦都回應過會應戰，但炒咗幾個月到依家都係影都唔見。而Mayweather日前就喺英國一個活動中表明自己「正式復出」，不過只限對McGregor喎！

拳王對上UFC冠軍，睇落就係一個好好嘅戲碼，但外國報導相當一致地唔睇好成件事。最主要原因係Mayweather本身嘅風評好差，有多次傷人紀錄、為人窮奢極侈，而且極度自大，經常撩是逗非，大家根本連見都唔想見到佢，加上McGregor本身亦係同一類人，成件事睇落就更加似係公關技巧炒作新聞。而Mayweather一直都要求McGregor上台同佢打Boxing，但身為UFC選手嘅McGregor其實冇參加過任何拳擊比賽，而且UFC同McGregor有約在身，相信就唔會輕易容許佢去參賽，亦到令到件事嘅成數極低。不過咁，如果真係成事，相信有好多人都會買家花生等睇戲。