OKOK，我知三千萬唔係一個小數目，我大概呢世都搵唔到呢個錢，但如果你拎3000萬喺香港買新樓，你買到啲咩樓呀？係，都買到中半山，但棟中半山有冇著名設計師幫你設計哂裏裏外外先？會唔會送部Aston Martin DBX過你呀？但呢棟位於紐約市中心嘅130 William就有啦！

由英國籍建築師David Adjaye爵士設計嘅130 William，顧名思義就係一棟位於紐約William街130號嘅60層高住宅，再具體啲咁介紹佢個地理位置，就係兩個街口外係美國聯儲局、再行前多少少就已經係華爾街，咁你可想而知個地段有幾咁黃金，啲單位又會有幾咁貴。但唔知係嫌佢唔夠貴定咩，David Adjaye爵士仲搵黎Aston Martin合作，於大樓嘅59及60樓設計咗五個特別單位，全部都用上Aston Martin Home Collection搜集嘅高級傢具，再由David Adjaye作點綴，詳細有幾靚大家睇相。

呢五個單位最平要近400萬美金，最貴要1,150萬，呢個價位明顯唔係平凡人買得起，所以送嘅入伙禮物都唔平凡，就係同樣由David Adjaye設計嘅Aston Martin DBX一部。我求其上網睇過美國車價大概係20萬美金——買千幾萬樓你送廿萬嘢，其實都算小家架啦。