疫情持續就黎一年，大家收入減少，但支出就冇少，老闆同業主叫大家一齊共渡時艱，但最後都係我哋單方面被人「姦」。反觀一啲相比之下冇咁發達嘅地方，就真係有啲充滿人性嘅安排。好似位於印尼渡假勝地峇里嘅一間酒店學校，就容許學生以椰子及樹葉黎做學費啦！

據《The Bali Sun》報導，位於峇里島「Tegalalang」嘅酒店學校「Venus One Tourism Academy」，由三月起就容許學生以椰子、辣木葉或崩大碗葉交學費，而學校就會利用椰子造出椰子油，再加入早葉製成草本香梘，再於學校內販售以維持營運。據該校校長Wayan Pasek接受當地傳媒訪問時指，本來每年學費就分三期收 (50%、20%、30%)，但由於體諒疫情影響學生家庭生計，所以推出呢個折衷辦法。校長亦話，要教導學生充分利用身邊嘅天然資源，將來疫情結束、學生投入酒店業市場時亦可以有不同嘅技能。

崩大碗葉

疫情重擊全球旅遊業，而作為旅遊勝地嘅峇里當然亦唔能夠獨善其身，目前當地政府禁止非印尼居民入境直至2021年，著名夜市亦要11點前收鋪。而來自疫情嚴重省份嘅學生亦被禁止回校上堂，其餘學生就分成三班輪流上堂。