護照乃係一國國民出國必備嘅身份證明文件，亦代表住一個國家嘅文化，甚至能夠成為令國民自豪及有歸屬感嘅原因——即係如果你啲國民嘅人生目標就係拎到另一個國家嘅護照，咁你個國家成功極都有個譜呀係咪？咁要點樣令一本護照有以上嘅效果？唔一定係要睇本護照有幾多免簽、個國家名有幾把炮，好似挪威咁選用一個精美嘅設計，其實已經可以令人對國家改觀。

挪威於2014年公開招募嘅新護照設計，最後就由挪威本土設計公司「Neue」提出嘅「Norwegian Landscapes」贏出，到近日就終於推出。封面採用紅 (普通護照)、湖水藍 (外交護照) 及白 (移民護照)三色以呼應國旗顏色，配上小小嘅燙金國徽及字樣，令護照由一本沉悶嘅官方文件成為極具設計感嘅高級筆記本。