日本無印推出嘅家品家具，相信係唔少人心目中理想屋企必備之物。但如果你好想投入無印嘅簡約風格，你就會發現淨係買一件半件係冇用，要買就要買一Set；然後你又會發現買一Set都冇用，要買到一屋都係；然後你又會覺得一屋都係都唔夠，要買就連間屋都係無印出嘅——而無印又真係有出屋你買喎，服未？

圖片：無印良品

日本無印日前推出「戶建 陽之屋」，「戶建」係成個「屋系列」嘅名，而「陽之家」就係推出嘅設計款式。早前無印亦已經推出過「木之家」、「窓之家」、「縱之家」等設計，但就係以城市環境為主。

而「陽之家」採用平房設計，淨係間屋 (有頂嘅部份) 佔地73.7平方米 (約800平方尺)，屋前有個幾乎同間屋一樣咁大嘅木造陽台，再加上極為開揚嘅大門窗設計，加強採光及通風外，亦將空間感延伸至室外，鍾意嘅話成張梳化搬出陽台嘆日光都得，非常適合住喺郊區又鍾意擁抱大自然嘅人。

圖片：無印良品

而內裏嘅間隔同樣非常開揚，雖然設計上有主人房、廚房、飯客廳等區域，但因為冇分隔牆嘅關係，除咗浴廁之外基本上冇明確嘅空間劃分，更為善用整個室內空間之外，亦令整個室內成為「一個空間」，加強住戶之間嘅共同感。

價錢方面，視乎大小、間隔唔同會有所差別。以上面啲圖嘅設計 (11.83m x 7.735m) 就要1,597萬Yen，即係120萬港紙左右；最貴嘅一款 (15.47m x 8.645m)就要2,057萬Yen，即係153萬港紙。特別要留意嘅係價錢係包埋室內照明、大門、床架、廚房鋒盤、浴廁、熱水燼等設備。

在 Instagram 查看這則貼文

無印良品の家 mujihouse（@mujihouse）分享的貼文

另外無印於新開嘅東京有朋Centre店內亦放出咗成間陽之屋，有興趣、第時又有機會嘅就去睇下啦。

資料來源：無印良品