意大利工作室Lazzarini Design作品一向以充滿未來感，創新風格聞名，最近佢哋又再次顛覆各位想像，設計出一款「中空」概念遊艇「The Shape」。

「The Shape」全長69米（226英尺），食水深度3.9米，船身中間鏤空出一個大洞，構成一個有「瓦遮頭」嘅寬敞空間，而頂層甲板更設有直升機停機坪以及一個玻璃底泳池，乘客可以從泳池底望返落洞內。位置船尾嘅生活區總共有三層，一樓係套房、二樓係起居廳、而三樓就係導航及控制中心。

Lazzarini Design並冇透露遊艇速度、引擎推力以及製作成本等多個技術參數，不過根據概念圖可以估計遊艇將會透過太陽能板取得電力。唔知有冇富豪會將呢個天馬行空嘅設計實現呢？