去旅行最忌水土不服，一個唔覺意急起上嚟，真係忍都忍唔住！特別係人在異地，去邊搵廁所都唔知窿路，That's why你喺香港見到咁多自由行好自由地打開括約肌，自由地喺街上留下自由的便便，真係Feel so free一身鬆晒。

不過香港人畀人管慣，自由呢家嘢真係識條鐵咩，學唔到人隨時自由解放便便，咪就要學識搵廁所囉。老老竇竇，有時候去外地旅行，地方咁大，唔係話幾步路就搵到商場/餐廳去廁所，如果呢個時候有個網站列出你附近可供使用嘅廁所，你就可以直接向目標進發唔使煩，諗起都覺得正！不過而家唔係得個諗字，因為真係有呢個Search廁所網站誕生喇！！

呢個Search廁所網站叫「SUKKIRI」，聲稱係全球首個廁所搜尋網站。當人有三急，但附近又冇廁所，就可以上「SUKKIRI」查詢，只要輸入你所在嘅地點，就可以利用定位服務，尋找距離自己位置最近嘅廁所。

目前呢個網站主要以大阪、東京等主要都市為中心，一共有17500間廁所登記於網頁之中，除咗一般商業建築嘅廁所可以喺「SUKKIRI」內登記之外，屋企廁所一樣都可以登記。

為方便腸胃唔好嘅人隨時隨地都有廁所用，「SUKKIRI」都大力呼籲民眾借出屋企廁所，當然，借出私人地方唔係白做嘅，登錄時網頁會詢問出借廁所時希望領取嘅收費（免費～500日圓），到真係借咗廁所畀人用，就可以經由SUKKIRI向借用者拎返錢。另外登記時仲可以揀埋available嘅時間，咁就唔怕突然有人三更半夜拍門要去廁所啦。