細個讀書嗰陣，去睇戲多數都係同女仔出街嘅kill time節目，消費唔高，又唔駛消耗體力，睇完仲可以搵到話題講，你話幾方便先。又基於呢個原因，你好少會執著睇啲咩戲，就算女友 / 女性朋友話去睇《崖上的波兒》，你都會笑住話好，你心諗，睇咩戲又有乜所謂啫。

你幾時知自己告別咗青春? 我認為就係當你知道呢兩件事嗰陣 : 一、自己鐘意啲乜，二、自己好忙，時間好寶貴。睇戲愈多，你愈會明白自己鐘意睇啲乜，文藝片、愛情片、懸疑片、恐怖片、戰爭片、動作片，總有啲題材你會狗衝，又會有的片你打死都唔會入場，朋友約你睇戲，你可以好瀟灑咁話「無興趣」。

出咗嚟社會工作，OT 無極限，甚至返到屋企都要繼續捱夜，生活唔再有暇餘，所以你更加珍惜手頭上可以運用嘅時間。套用返上面嘅情況，唔係好鐘意睇嘅戲，你都唔會特登早收工、用一晚嘅時間同金錢入戲院坐兩三個鐘，學一眾同事話齋，「聽日唔駛返工咩你估」。

打開Group Chat，隨便問句有無人想睇《復仇者聯盟》，可能仲有人肯俾面揮手，但若果你問有無人想睇HKIFF啲外國片呀，肯定一片死寂。呢度講少少電影，其實HKIFF嘅外國片 (包括Cult 片)，有好多都係得獎作品，雖然唔係商業片，但水準都有保證。更重要嘅係，有啲片喺香港係永遠都唔會上映，你亦都唔會買到佢啲碟，一生一機會，miss 咗就係 miss 咗，無得返轉頭。

《電影關不住 Closed Curtain》

何謂Cult? 我唔直接答你，2013年有套叫《電影關不住》，由伊朗導演約化巴納希 (Jafar Panahi) 與金波塞亞柏托維 (Kamboziya Partovi) 合導，勇奪柏林影展最佳劇本銀熊獎。電影開場，導演用咗個10分鐘長鏡頭，影住鐵閘外面嘅街景，啲人行嚟行去，你可以話佢好悶拖戲嚟做，你又可以話佢好有意思，解釋咗導演被禁拍多年，心中希望拍片嘅慾望，呢啲，就叫 Cult。

肯花時間同睇你Cult片嘅人，一係電影發燒友，一係嗰種「珍惜相處時間」嘅朋友。無論前者定後者都唔易搵，有呢啲人響身邊係一件極之、極之幸運嘅事。我對一個人睇戲並唔反感，有時仲幾自由，只係有 fds 響隔離分享電影，感覺更加良好。至少，當睇完子夜場，條街又靜又大風嘅時候，你仲可以搵到朋友食宵，溫暖饑餓嘅心靈。

假如，你身邊仲有呢類朋友，請好好珍惜佢地。