中國人也不開心中國首富兒子如是說

文：MenClub 魏文青　　
POSTED ON 06 Sep 2015

早幾日文青同大家講過遊戲《Minecraft》創造者Markus Persson將整個版權賣咗畀微軟之後一夜暴富，但卻喺Twitter上面大呻「其實有錢不快樂只係你啲窮人未發覺」。結果？我哋呢啲凡夫俗子就當然冇辦法身同感受。OKOK，可能係因為佢出身自瑞典呢個除咗維京人同伊巴謙莫域(又或者龍格堡)之外我哋就一無所知嘅地方，所以佢比出黎嘅生活貼士我哋聽唔入耳。好，咁我哋又黎聽下中國代表講啲咩？

造說BBC早前就做咗個叫《Secrets of China》嘅紀錄片系列，目前播出咗嘅兩集入面分別探討咗中國嘅年青人成長過程、以及戀愛婚姻狀態。其中第一集《Fit or Fall Out》中，主持人先去到一個軍訓營，與一班被父母送入去「導正」嘅小朋友接觸，仲發現其中好多小朋友又沉迷打機。為咗搵出點解咁多中國小朋友咁鍾意打機，佢於是就走咗去訪問近期同誠哥爭做「華人第一首富」嘅中國首富王健林個仔、被稱為「國民老公」，今年27歲嘅王思聰。

呢位被稱為「中國富二代的面子」嘅…呃…富二代，自小就被老豆送去新加坡、英國等地讀書，長大後回到偉大租國努力健設。2011年買下當時嘅CCM戰隊，並改名為「IG(Invictus Gaming)」，於電子競賽界打響名堂。換言之佢又係後生、又係「機」界中人，又有社會地位，難怪BBC會訪問佢啦。

當時BBC問王思聰，認唔認為中國小朋友之所以咁沉迷於電玩世界，係因為佢哋需要逃離現實生活中來自父母及學校嘅壓力，王思聰以流利英文回答：「打機的確是脫離每日返學放學沉悶生活的方法。」而實際上有冇辦法可以脫離呢個模式？王思聰就指脫離其實就等如自殺，「首先你父母大概會先殺死你，然後如果你不是極自信以及極愚蠢，否則根本沒辦法於模式外取得任何成功。」問題係，咩為止成功？「(中國)政府定義甚麼是『主流』，然後市民就必須跟從；如果你不跟，你就是『錯』的。但明顯地每個人都會有自己的想法，於是他只好戴上面具生活，把真正的自己隱藏於面具之後。Online Game之所以受歡迎，是因為於網絡世界上你可以做自己想做的事，而不用去迎合『主流』。」

咁中國人係咪因為缺乏自由而唔開心？王思聰指「只是去到某個點，你就接受了(生活在中國是不開心的)而已。所以你不會看到中國人有什麼抗議，因為他們知道即使抗議了也不會有什麼改變。