日本著名滑冰選手綽號「冰王子」嘅羽生結弦，過去嘅12月7日係佢嘅25歲生日，而當日佢繼續去參加花式溜冰大獎賽總決賽，但係較可惜佢最終只係奪得亞軍。雖然羽生最終未有奪冠，但佢仍然成為場上嘅焦點，因為佢一班Fans為佢送上極多佢鍾意嘅小熊維尼。

就喺羽生完成呢場比賽跪喺場上之際，場邊嘅觀眾特別為羽生送上生日禮物，不斷送場邊拋大大小小嘅小熊維尼落冰場，數量之多實在驚人，而眼見一隻隻維尼飛墜冰面唔知你會唔會有一絲絲快感呢？

而呢場「維尼雨」隨即引起國外關注，並成為熱話，但可能唯獨一個國家唔會有呢段消息。其實過去每當羽生完成比賽後，Fans都會拋下維尼熊以鼓勵羽生，而羽生自己每次比賽都會帶一個維尼熊造型嘅紙巾盒，說明佢真係好鍾意維尼熊。

羽生過去曾於兩屆冬季奧運都奪得金牌，並奪得兩屆世界花式滑冰錦標賽金牌、四屆國際滑冰聯盟花式滑冰大獎賽總決賽金牌，從2013至2018年連續5個賽季世界排名第一，18次打破短曲、長曲及總分嘅世界紀錄，絕對係當今最受矚目嘅滑冰選手。