曾經來港踢傑志嘅世界盃金靴烏拉圭傳奇射手科蘭，喺岩岩嘅星期六於祖國舉辦生涯告別戰，多位球星亦都參與其中，當中包括蘇亞雷斯、列基美，華朗、J辛尼迪等等，而「蘇神」就更加於比賽中搶鏡，佢竟然「再」一次當起門將為球隊撲救。

現年40歲嘅科蘭，於球員生涯最後時刻令香港球迷驚喜的竟然加盟本地球隊傑志，並喺本港球迷眼前多番展示其世界級水平嘅射術，相信一眾本地球迷一定記憶猶新。其後，科蘭於今年8月嘅時候正式宣佈掛靴，並表示將會舉行告別戰。

而講番科蘭呢場告別戰，主角當然係科蘭本人，但作為烏拉圭國家隊嘅前隊友，蘇亞雷斯喺呢場比賽入面亦玩得非常開心，甚至於比賽期間突然擔任起龍門，其中更有唔少精彩嘅撲救添。

唔知大家仲記唔記得，2010年世界盃八強烏拉圭面對加納，於加時賽最後一分鐘加納嘅一次必入頭搥被作為前鋒嘅蘇亞雷斯於門前白界線前用手撲救，其後球證當然向蘇亞雷斯出示紅牌兼判罰12碼，但加納竟然射失呢球12碼，最終於互射12碼烏拉圭再以4:2射贏加納，殺入該屆世界盃嘅四強。

就係因為蘇亞雷斯即使知道會被紅牌仍然出手撲救，烏拉圭最終成功殺入世界盃四強，同屆世界盃科蘭個人攻入5個入球並列射手榜第一，兼且最終成為呢一屆世界盃最佳球員。所以，科蘭絕對愛死蘇亞雷斯，而蘇亞雷斯亦都同出任門將有一個特別嘅關係。