日前，英超球隊利物浦官方正式宣佈，將於2020-21球季起結束與New Balance嘅合作關係，並與Nike展開合作，後者將成為紅軍嘅官方球衣供應商。

利物浦與Nike將於2020年6月1日正式開始合作，到時Nike將會全面為利物浦提供裝備，其中包括球衣、訓練衣、旅行裝等等，而當中包括利記嘅男子隊、女子隊、青訓隊、訓練人員等，基本上係包括利物浦所有人員。

作為目前英超聯賽嘅榜首球隊，利物浦今季嘅表現可以話冠絕四大聯賽，因此Nike成功搶得其贊助權對於公司黎講絕對係非常成功的。而對於利物浦黎講，與市場佔有率更出色嘅Nike合作，將可以進一步將波初銷售額增加。

而目前利物浦嘅球衣贊助商New Balance，其實自2012年起就由NB旗下子公司勇士牌開始贊助，直至2015年正式改由NB冠名贊助，因此實際上雙方已經合作8年。不過，其實今次與NB分手都算係有啲不歡而散，因為紅軍想與擁有較大銷售網絡嘅Nike合作，但NB卻希望擁有優先續約權，最終雙方對簿公堂，並以紅軍勝訴作結。