WBC重量級世界拳王金腰帶再一次上演Tyson Fury挑戰腰帶持有人Deontay Wilder，上一次雙方激戰12回合下打成平手，今次雙方再次約戰拉斯維加斯，勢要分出勝負。

作為一剛一柔嘅代表，Wilder為力量型拳手，一拳致勝型，而挑戰者Fury則為技術型拳手，出拳有部署，閃避能力出眾，因此當呢兩位拳手走上擂台，就形成一場非常精彩的比賽。

與上次對決不同，今次Fury明顯有備而來，一開場已經主動出擊掌控比賽，相反Wilder繼續一貫作風，想用右手一拳KO對方，雖然當中仍然有拳擊中過Fury，但卻未能將佢打倒。而Fury則靜待機會，虛虛實實嘅出拳令Wilder難以捉摸，同時唔少出拳亦都成功擊中Wilder頭部。

戰至第三回合，Fury一下突擊成功將Wilder擊倒在地，令全場歡呼。其後Wilder明顯形勢急轉直下，同時加上其體力不繼下，Fury完全掌控比賽節奏，最終於第七回合一番強攻下，裁判將比賽終結，Fury成功擊敗Wilder，取下WBC重量級世界拳王金腰帶！

現年34歲嘅Wilder，自從2012年12月成功奪得WBC重量級拳王金腰帶，一直保有8年時間，黎到今日終於被Fury搶去，同時其不敗戰績亦同時告終，由2008年轉為全職拳手後44場比賽首次錄下敗績。

另一邊廂成功搶走WBC金腰帶嘅Fury，戰績則改寫為31戰30勝1和，不敗戰績繼續，而因為Anthony Jousha較早前嘅敗績，令Fury成為現今唯一不敗嘅重量級拳王！