今屆奧運除咗雲集各國健兒之外，由多位飽受戰火迫害運動員組成，不為國家而戰嘅難民代表隊（EOR）亦再次登場，其中游泳選手Yusra Mardini就因為有住驚人嘅故事而備受關注。現年23歲嘅Yusra Mardini出生於敘利亞，原本係敘利亞游泳選手，但2015年因戰亂從海路逃離敘利亞，當時20幾個人迫埋喺隻船仔，只有4個人識游水，點知引擎中途故障，於是佢同阿妹就一齊跳落水幫手推船...

正當船身開始入水，差啲全船人「攬炒」嗰陣，Yusra Mardini就同阿妹以及另外兩位識游水嘅同行者，二話不說跳落水幫手推船近3個鐘，就算本身係游泳選手嘅佢都感到筋疲力竭，好彩引擎及時搶修成功，最終全船人順利抵達希臘列斯伏斯島（Lesbos）。Yusra Mardini與同行者上岸後，徒步經過北馬其頓、塞爾維亞、匈牙利、奧地利多地，期間有唔少同行難民被捕，亦有陌生人無私接濟，經歷各種艱難最終成功到達德國定居。

期後Yusra Mardini開始喺柏林接受游泳訓練，並成為難民代表隊一員出戰2016年里約熱內盧奧運，參加100米自由泳及100米蝶泳，只可惜當時未能擠身決賽。事隔5年再戰今屆東京奧運，成為難民隊持旗手進場，而Yusra Mardini亦不負眾望，喺24日舉行嘅女子100蝶泳初賽獲得小組第3名，雖然未能成功晉級，但佢賽後就出文感謝所有人支持，強調佢嘅旅程唔會就此完結，同時亦為自己可以代表全世界8000萬難民而自豪。

在 Instagram 查看這則帖子

Yusra Mardini（@yusramardini）分享的帖子

資料來源：snopes、skynews、eurosport