嚟自澳洲嘅短跑選手Riley Day，日前喺女子200米準決賽以22.56秒創下個人最佳成績，雖然屈居第4無緣晉級決賽奪牌，但佢仍然非常興奮，更忍唔住喺鏡頭前直呼「Holy Shxt！」。事實上，佢喺冇贊助商嘅情況下，靠住邊訓練邊打工儲旅費，一步又一步登上東奧舞台。

今年21歲嘅Riley Day目前係一位大學生，由於冇贊助商，所以備戰期間每個禮拜都會到超市打工儲旅費。據超市老細所講，雄心勃勃嘅Riley Day除咗每個禮拜會訓練6日，每次至少3個鐘之外，佢同時係一位稱職嘅員工，過去18個月一直幫一位視力唔好嘅90歲伯伯買嘢，甚至記住對方平時要買啲乜，如果伯伯嗰個星期冇去鋪頭幫襯，仲會打電話慰問對方。

由於只差0.26秒就可以擠身決賽，唔少澳洲市民都戥佢可惜，不過Riley Day賽後表示以一個21歲首次參加奧運嘅人嚟講，今次成績唔算太差，總括嚟講都係開心嘅，仲話如果大家想關注佢嘅旅程，可以Follow佢IG，同時放眼出年嘅世界田徑錦標賽以及英聯邦運動會。當網友們知道佢嘅勵志故事後，都紛紛幫手搵贊助商，希望佢下屆奧運可以再創高峰。