東京奧運雖然因疫情關係而未能有觀眾入場，但香港隊嘅表現成功創下歷史，1金2銀3銅合共6面獎牌可以話令大家興奮到暈。不過都係個句，奧運仲未完架，因為黎緊8月24日就係殘奧會開幕，香港隊仲有24名運動出戰8個項目，需要你同我一齊為佢地加油打氣。

而近日一套以香港殘疾運動員「神奇小子」蘇樺偉為藍本嘅電影《媽媽的神奇小子》上映，立體呈現出香港對待殘疾運動員，以至對待殘疾人士嘅嚴重落後及不足，甚至係不公。

你可能知道蘇樺偉作為香港殘疾運動員好出名，但你又知唔知佢有幾勁? 佢由1996年開始參加殘奧會，當年佢就係同「風之后」李麗珊一樣奪得奧運金牌，只係佢嘅金牌係黎自殘奧會，因此受關注程度遠不只10倍之差。

往後蘇樺偉分別喺2000年、2004年、2008年、2012年嘅殘奧會當中奪得3金2銀、1金2銀、1金1銅、1銀，合計6金5銀1銅，一個人已經超過晒港隊喺奧運歷史上奪得嘅獎牌數，並且包括保持兩項世界紀錄。

不過令人痛心嘅係，就算拎到咁好嘅成績，殘疾運動會獲得嘅關注同支援都比肢體健全嘅運動員少得多，無論係獎金、津貼都差天共地。有指當年香港為獲獎嘅奧運運動會提供300萬獎金，但奪得殘奧會獎牌嘅蘇樺偉就只有30萬獎金。

你可能會講，鬼咩殘奧會有幾多人睇呀? 少人睇自然就少啲獎金同人工架啦。現實可能真係嘅，但係正因為咁我地更加要話比佢地聽，其實香港人都會支持佢地架，佢地都係香港嘅代表，值得全港市民支持的！

撐！撐爆香港運動員！