C朗拿度已經確認從祖雲達斯重返曼聯，對此一眾紅魔迷流晒口水，而其公司股價亦因此而上升。咁究竟36歲嘅C朗除左叫座力之外，仲可唔可以帶比紅魔質量上嘅提升呢? 答案基本上係肯定的。

世界盃歐洲區外圍賽尋晚再度展開，其中由C朗領軍嘅葡萄牙主場迎戰愛爾蘭，不過主隊就於45分鐘先失一球，並一直落後至89分鐘。

以為葡萄牙就咁0:1落敗? 咁你就錯啦，C朗嘅價值呢個時刻完美體現出黎，佢再次以「空中霸王」嘅姿態，先後於89分鐘及吹雞前96分鐘以頭鎚破門，最後2:1反勝對手。而今場嘅反勝，C朗亦破左世盃外圍賽紀錄，因為歷史上所有大洲7713場世盃外圍賽，於89分鐘仍然落後，卻可以梅開二度逆轉比場贏波嘅，僅此C.朗拿度1人。

其實C朗過去嘅頭鎚一直為人樂道，特別係佢嘅起跳高度異於常人，無論效力曼聯、皇馬及祖記個陣都曾完美展示過。而今次則為葡萄牙於關鍵時刻再次以頭鎚帶來勝利，相信曼聯球迷見到之後一定更加期待C朗再次披起紅魔球衣。