年僅只有23歲嘅鷹隊核心Trae Young，雖然身高只有1米85，體型又非常瘦削，甚至因此被人稱為「排骨仔」，但呢名排骨仔卻以逆天嘅三分球力，上季帶領鷹隊在Playoff先後以第5種子身份以下克上殺退紐約人及76人，順利殺入東岸決賽，雖然最終未能擊敗最後的總冠軍公鹿，但其領軍能力已經令人刮目相看。

新球季將至，相信Young嘅能力必定更進一步，而就喺開季前adidas為呢位「排骨仔」推出首款簽名籃球鞋Trae Young 1，足以證明其影響力進一步擴大，及奠定未來NBA巨星之一嘅身份。

今次Trae Young 1嘅設計，Young自己亦都有份參與，特別針對其場上靈活多變及獨特嘅移動方式，以無鞋帶N3XT L3V3L鞋款作為靈感，最終決定Trae Young 1採用低筒設計，配上鞋帶並以包裹形式減低鞋帶鬆脫嘅機會；鞋踭使用以BOOST緩震科技，中底則用上LIGHTSRIKE科技，令具備緩震的同時助球員提升靈敏度。

而顏色方面因為今次特別與美國著名飲品品牌ICEE合作，所以鞋身均以粉藍色為主，配上白色及紅色嘅細節，並於鞋尾位置印上ICEE 北極熊Logo圖案以及Young嘅個人簽名。