冬天就話可以披披搭搭，左襯右襯，一時西裝骨骨，一時書卷味才子，百變造型之下，全部要靠襯上唔同嘅衣飾，當然，十幾度嘅時候，著住件皮褸加頸巾扮型都無問題啫，但一到夏天，日日30度以上，成股熱力殺過嚟，乜嘢襯衫心情都被溶化晒啦！

咁點算？唔通各位Gentlemen每逢夏日就得放棄造型，只可以沉悶地日日以T恤波褲示人？聽落好鬼淒涼，明白普遍男士都怕熱，天生極易流汗，身不由己之下，令大家到夏日期間，就完全無選擇打扮嘅權利。其實情形又未必去到咁worst，有幾個衣著上嘅簡單襯搭手法，可以幫到大家唔駛日日與T恤波褲為伍，有返啲造型感；

1.怕熱又想著恤衫，捲袖兼解領頭扭咪得囉，
若果恤衫喺麻質物料就更加通爽。

2.三角骨短褲同波褲一樣咁舒服通爽，上身襯埋淺色短袖恤衫，爽晒！

3.必備太陽眼鏡，遮光之餘，加番啲星味俾自己

4.除咗白波鞋，涼鞋都喺夏日大熱，尤其是Teva更加氣候如虹。

5.戴紳士款草織帽，保持頭部通爽，又可以將冬天嘅紳士帽潮流繼續keep住。