外表的確升呢型仔咗，但就唔記得咗留鬍鬚位置嘅肌膚其實都需要好好護理，唔好以為留咗鬍鬚，有鬍鬚摭住咗就唔駛理，咁諗法就錯晒！因為留鬍鬚位置更易藏有油脂污垢，唔好好處理，暗瘡粉刺就會標晒出嚟，到時幾靚仔都無用啦！

其實對於留鬍鬍地帶，要有另一套集中性護膚技巧，大家要留意番。

1.加重下巴位護膚

留鬍鬚後，除咗慣常地要注意T字位出油部份外，屬於留鬍鬚地帶嘅下巴位置，都要納入重點護膚部份，始終該位置接近咀唇位置，每日靠把口飲飲食食，咁就會留底咗唔少油漬污垢係鬚上面，所以，除咗每日須要沖洗乾淨該位置外，該位置更加要定時做深層清潔，咁先唔會堵塞毛孔。

2.蒸面助毛孔張開

因為有鬍鬚後，毛孔會較平時難以張開，就算洗臉時多加按摩該位置，其實都好難清走污垢，所以，推介大家用蒸面方法，將毛孔得以擴張，令洗面時可以輕易咁將毛孔內嘅油脂污垢清除，方法係洗面之前，係洗手盤放滿熱水，再將臉部擺近大約蒸20-30秒，令毛孔打開後，先再去洗面，咁就可以慳水慳力將內藏污垢迫出。

3.記得拍鬚後水

千祈唔好懶，修剪鬍鬚後一定要拍鬚後水，以作鎮靜作用，加強為該位置補充水份，及能夠將毛孔縮細，因為修剪時經常會出現剃損情況，若置之不理，會令毛孔粗大及紅腫，要及時懂得護理，拍上鬚後水。