對於熱愛日系Fashion嘅人黎講，日本雜誌嘅「街拍」可能曾經為你提供過唔少穿搭靈感。但正所謂人會變、月會圓，你又有冇諗過當年被雜誌選中嘅「潮人」，今時今日又會著緊咩衫呢？日本時裝雜誌《東京Graffiti》早前就進行咗個非常有趣嘅特別企劃，搵返十幾廿年前上過雜誌嘅街頭潮人，睇下佢哋依家變成點！

約20年前に取材したギャル男・マンバギャルを再撮影させてもらいました
何があるか分からないから人生は面白い

東京グラフィティ最新号に掲載中！ pic.twitter.com/UDVtVKn8no

— 東京グラフィティ (@tokyo_graffiti) September 25, 2024

於創刊號以極具視覺衝擊力打扮亮相嘅「#Maki」，20年過後唔單止做咗地產經紀，仲由茨城縣搬去東京黃金地段港區

《東京Graffiti》係一本於2004年創刊嘅日本文化雜誌，其最大特色係每期都會以東京原宿、澀谷、秋葉原、巢鴨等地區嘅普通民眾生活作為主題，涵蓋戀愛、家庭、獨居等話題，而時尚當然亦其報導範圍之一。適逢今年係雜誌創刊20週年，所以《東京Graffiti》早前就進行咗個特別企劃，就係搵返十幾年前曾經登上雜誌嘅「街頭潮人」，睇下佢哋依家著咩衫、過緊點樣嘅生活，並將部份內容發佈到官方X（Twitter）之上。

公開嘅三位「潮人」於過往都係所謂「ギャル男・マンバギャル」嘅愛好者（可以極粗略地理解為所謂嘅「澀谷系」），但依家嘅打扮就相當「正常」。其中於創刊號以極具視覺衝擊力打扮亮相嘅「#Maki」，20年過後唔單止做咗地產經紀，仲由茨城縣搬去東京黃金地段港區；另一位當年以辣妹打扮登上雜誌嘅19歲少女「佐佐木彩」、現時已經係37歲嘅媽媽。佢笑言自己當年沉迷於認識新朋友，但依家就沉迷於為小朋友煮飯，仲希望到佢80歲時可以再為雜誌影多次相。最後一位係當年只有16歲嘅「Freetique」，現年31歲嘅佢因為鍾意古著同古董電單車，所以目前開咗自己嘅鋪頭。

當年以辣妹打扮登上雜誌嘅19歲少女「佐佐木彩」、現時已經係37歲嘅媽媽。佢笑言自己當年沉迷於認識新朋友，但依家就沉迷於為小朋友煮飯，仲希望到佢80歲時可以再為雜誌影多次相

當年只有16歲嘅「Freetique」，現年31歲嘅佢因為鍾意古著同古董電單車，所以目前開咗自己嘅鋪頭。

呢個特別企劃除咗勾起網民嘅回憶，亦呼應雜誌本身「以大眾為主題」嘅核心，以一個頗有詩意嘅方式表達20年來東京民眾嘅生活變化。所以企劃公開後獲得網民大量好評，目前相關帖文已經有超過750萬次觀看、近11萬個讚好。唔知各位睇完又有咩感受呢？

資料來源：東京Graffiti