七月中，正式踏入旅遊旺季，好多人都打算出門充電兼血拼。去旅行，搭車又搭船，仲要搭埋飛機，行李喼當然愈輕愈好，但有咩方法同時可以放多啲。

其實，「執喼」都係一門學問，以下幾點即學即用，包你可以為行李喼騰出唔少空間。

衣服摺疊法

男士們唔似女士咁著條連身裙就可以通街走，基本上要分開衫同褲兩樣Item先出得門口，你可能學「長毛」咁，覺得著短褲係好莊重嘅，但有唔少作風較舊嘅食肆、名店，以至藝術表現場地，都要求顧客只少著長褲及有領扣鈕Polo Shirt。不過，褲佔用空間較多，所以今次先講點放褲，以下6項不妨平時預先練習。

1. 先將長褲上半段舖喺喼入面，下半段露出喼外
2. 第二條長褲同樣上半段放入喼內，舖喺第一條長褲上面，下半段往相反方向露出喼外
3. 重複以上動作直至放晒所有長褲
4. 將衣服摺好放入喼內（長褲上半段之上）
5. 好似包禮物咁，將外露於喼外嘅長褲下半段向喼內摺埋，包住啲衫
6. 一層層左右左右咁將長褲逐件向喼內摺埋