Dyson吸塵機嘅吸塵能力一直備受讚賞，但同時我亦聽過唔少人話Dyson吸塵機好大部、好墜手，而Dyson似乎都知呢個係自己最大短板，於是最新推出Digital Slim輕量無線吸塵機，保持吸塵能力之餘大幅減輕體積及重量。

據官方資訊，Digital Slim比起Dyson V11體積減少20%、重量減少30%，只有不足1.9KG，但入面個特別設計、有11個渦旋式氣旋組嘅Dyson Hyperdymium摩打，就保持其吸塵能力依舊強勁。另外Digital Slim亦配備重新設計嘅軟絨毛滾筒吸頭，重量減少40%，但改變咗內部氣道反而加強縫隙清潔力，另外延長管都為咗減重而短咗同薄咗。簡單黎講，就係保持吸塵能力嘅情況下，輕得嘅佢都整輕咗啦。

點解要咁設計？Dyson就話佢哋仔細研究過香港人嘅家居及清潔習慣，發現香港家庭經常頻繁而短暫地使用吸塵機，而且地板大多為硬質而地氈，再加上香港啲樓地方唔大，於是輕量、細小、吸力強勁就變得非常重要。另外亦多咗個有LED燈嘅隙縫吸頭，方便隊入去啲陰暗位睇清啲塵黎吸。

值得一提嘅係Digital Slim嘅於節能模式下可以於硬質地板運作40分鐘，強效模式就可以維持5分鐘，亦保留一鍵換電設計。

左起Digital Slim Fluffy、Fluffy Extra、Fluffy Pro

Digital Slim系列總共有3個型號，分別為最基本嘅Digital Slim Fluffy (HK$4180)，多咗LED隙縫吸頭、床褥吸頭、高處清潔轉接頭嘅Fluffy Extra (HK$4680)，以及配備埋頑固污垢塵掃嘅Fluffy Pro (HK$4880，只限Dyson官網及圓方體驗店)。

資料來源：Dyson