Facebook同Google一直以嚟因為壟斷市場或隱私問題而惹上唔少官非。最近《紐約時報》取得有關文件，發現兩間公司曾經「合作」。Google畀Facebook更多時間競標廣告位置及投放廣告折扣優惠，換取Facebook上廣告保證投放量及支援Google「Open Bidding」廣告投放模式，最大化雙方廣告投放效益。

據《紐約時報》報導，呢個名為「Jedi Blue」嘅協議（睇嚟佢哋都係星戰迷），可以令Facebook能夠喺Google廣告投放系統下更有效率同更平價咁去投放廣告，由此每年賺取大量廣告收益，而Google都可以確保佢啲廣告可以係Facebook上有足夠曝光率，咁樣當然不利其他公司投放廣告。

Facebook同Google否認紐約時報報導嘅講法，表示呢種廣告交易係業界好普遍，並唔會阻礙市場競爭。Facebook表示呢個協議只係增加廣告拍賣競爭，其他解讀都無根據；而Google就出咗篇長文解釋，係其他人誤解咗佢哋合作。咁樣究竟有無壟斷市場就要交返比法院去研究啦，但兩間大公司成日都被人鬧壟斷，呢種「協議」會被人放大嚟睇又在所難免嘅。