最近日本人力資源機構「MENTER」針對大學生電腦能力訪問咗519名大學生，結果發現高達4成人唔知道「複製貼上」嘅快捷鍵Ctrl + C及Ctrl + V，莫非係因為新一代較常使用電話及平板電腦？

據調查數據顯示，只有62.6%受訪者知道「複製」快捷鍵Ctrl + C，59.2%人知道「貼上」Ctrl + V，而且約莫得3成人知道「復原」Ctrl + Z、「剪下」Ctrl + X、「儲存檔案」Ctrl + S、「全選」Ctrl + A等常用快捷鍵，甚至有近2成人係完全唔知道任何快捷鍵。

至於電腦持有率及滑鼠使用率方面，有83%人擁有個人手提電腦，12.7%人擁有個人桌上型電腦。大約有6成人表示「經常使用」(31%)或「有時使用」(32.2%)滑鼠，超過3成人表示「幾乎唔用」(29.9%)或「從來唔用」(6.9%)滑鼠。

對此，唔少網民就認為比起快捷鍵，使用滑鼠右鍵「複製貼上」更為方便。另外，有網民指出好多人上到大學先第一次使用電腦，所以新生可能唔太熟悉快捷鍵，若然只係針對大四學生進行調查，相信結果會有所不同。唔知大家又鍾意用快捷鍵定係滑鼠「複製貼上」多啲呢？