如果你有打開機，尤其係有玩如《Monster Hunter》等第三身動作遊戲，相信對於遊戲中嘅「正向」或「逆向」鏡頭操控唔會陌生。但你又有無諗過自己點解會用「正向」或「逆向」操作？更重要嘅係，你有無諗過自己一直都用錯方法？轉一轉去打機表現會更加好？

圖片：Pixabay

所謂「正向操控」，就係指當你將個「蘑菇頭」推向左時，個鏡頭係向左轉（畫面入面嘅嘢向右移）；而逆向就係相反，「蘑菇頭」向左，但鏡頭向右轉（畫面入面嘅嘢向左移）。而英國倫敦Brunel大學嘅兩名學者，早前就針對「點解有啲人用正向、有啲人用逆向」做咗個研究，並於近日發表。

研究首先詢問受訪者目前用緊邊種操控方式，以及自認為點解會用呢種方式。當中唔少人都指係因為受過程玩過嘅某隻Game或某部主機嘅預設方法影響。但研究進一步要求受訪者進行一系列空間理解能力測試（例如於腦中旋轉隨機圖形，又或推算中圖片中「人物」的視角等），結果就發現用越短時間完成任務嘅人，使用「逆向鏡頭操作」嘅機率就越低。換言之能解更快理解空間概念嘅人，都會傾向使用「正向操作」。

圖片：Pixabay

但用緊「正向操作」嘅你唔好太開心住呀！因為研究發現使用逆向操作嘅人，答問題嘅準確率會更高。換言之空間理解更快嘅人會偏向用「正向操作」，而空間理解更準確嘅人就會用「逆向操作」。其中一名研究者Jennifer Corbett甚至提議，用開「正向操作」嘅人可以試下改用「逆向操作」，有可能會提高準確度從而提高遊戲表現：「可能無用，但根據我哋嘅研究，絕對值得一試，因為真係有可能大幅改善競技遊戲體驗。」

資料來源：The Guardian